Dint’ ‘a munnezza – Da un post di Bruno Fusco

Bruno Fusco

‘O tiempo era chiù nniro ‘e ll’ati juorne,
e ‘o poco d’acqua ll’e cadeva ‘ncuoll’
e senza ‘mbrello, senza n’ombra e scuorno,
jeva cercanne e scart’ miezo ‘a foll’.

Io me fermaje a guardà pe’ cumpassione,
‘ncoppo ‘a ventina a devo a ‘stà guagliona,
capille riccie ‘a sciarpa e ‘nu maglione
è ‘na tristezza scritta ‘nfaccia ‘e prufessione.

Cercava ‘into ‘a munezza chisà cosa?
Po’ se girava e se guardava attuorno,
comm’a n’auciéllo ca nun s’arreposa,
se trascinava ‘a vita tutt’e juorne.

S’avvicinaje ‘na banda e guagliuncielli
ca pe’ diletto fanno sempe ‘a guerr’,
‘o chiù balordo e chilli capuzzielli,
a dette ‘na vuttata è jette ‘nterra.

Nisciuno llà presente miezo ‘a strata
vulètte intervenì pe’ da ‘na man’,
guardaveno cu ll’aria distaccata
e ‘a stèveno a trattà peggio e ‘nu can’

“Ascite a llà nun ce scassate ‘o cazz’,
ma pure quanno chiove ato sbarià
se vede ca cu ll’acqua ascite pazz’!?
Mo’ chiammo ‘e guardie se restate ccà!”

Avetto intervenì miezo a ‘sta guerra:
“ma che tenite ‘e prète dint’o pietto!?
Vedite a ‘na guaglione stesa ‘nterra
è rummanite fermi…, pe’ dispietto!?”

“Vuie site buoni sulo a giudicà!?
Facite ‘e faccie e ll’aria schifettosa,
restanne sulamente pe’ guarda?
Po’ iate a casa pe’ raccuntà quaccosa!?”.

Doppe stù sfogo me giraie a guardà
si ‘a sfurtunata se puteva aizà
meza ciaccata e senza riciatà,
me guarda dint’o a ll’uocchie, è se ne và.

“Avito visto!? Bellu ringraziamento!”
Dicette ‘nu signore addereto a mmè
“manco ‘o saluto doppo ‘o sarvamiénto,
è vuie ve ‘ntussecato comm’a chè”

“Sentite a mmè stà ggenta dè bbarracc’
vo vivere accussì, so’ proprio ‘e razza,
‘e capi gruoss’ s’abboffano int’o ‘a sacc’
jè piccerilli stanno ‘into ‘a munnezza!”

Forse era muta, forse era appauràta,
cercavo ‘na ragione ‘ncapo a mmè,
ma no pecchè nun m’eva salutato,
ma sulo pe’ capì comme è pecchè?

Era schiuvuto e j me chiaje ‘o ‘mbrell’,
vulevo aggiungere, vulevo replicà,
pecchè guagliona belle comm’è chell’
nun ponno fa sta vita a chell’età.

Ma po’ pensaie “ma a mmè chi mo fa fa?
Che me ne fotte ‘e chesta tenerezza”.
Giraie ‘nu vico ‘e a chi vaco a ‘ncuntrà?
N’ata figliola ca capa int’o a munnezza!